Gair i Gall 1:

Peidiwch â rhoi’r ffidil yn y to – nid yw’n hawdd! Pe bawn i’n cael £1 am bob tro gofynnodd rhywun i mi “beth yw’r ffordd orau o gysylltu ag / gweithio gydag ysgolion?” – byddwn i’n graig o arian!

Gair i Gall 2:

Defnyddiwch bob ffurf o farchnata sydd ar gael i chi – peidiwch â dibynnu ar un peth yn unig.

Gair i Gall 3:

Ceisiwch beidio ag atodi dogfennau PDF i e-byst cychwynnol i athrawon gan na fyddant o bosib yn mynd trwy eu gosodiadau diogelwch/sbam.

Gair i Gall 4:

I mi, nid yw gwefannau na hysbysebu mewn cylchgronau’n gymorth mawr, felly peidiwch â gwario ar hynny. Mae pentyrrau o gylchgronau ar fyrddau coffi ystafelloedd athrawon sy’n ymddangos fel petai neb wedi eu cyffwrdd.

Gair i Gall 5:

Ffoniwch ysgolion lle cewch hyd i athro penodol yn gyswllt i chi. Mae’n bosibl y bydd gweinyddwyr a/neu ysgrifenyddion yn borthgeidwaid ac na fyddant yn trosglwyddo gwybodaeth.

Gair i Gall 6:

Os byddwch yn defnyddio e-bost, ceisiwch gynnwys enw’r athro (At sylw:…) yn llinell y neges fel ei bod yn cyrraedd yr unigolyn cywir.

Gair i Gall 7:

Wrth weithio gydag athro penodol, cynigiwch gymorth iddo gyda gwaith cynllunio, cysylltwch ef â phobl a safleoedd sydd ag adnoddau rhad ac am ddim – codwch ei ymwybyddiaeth o’r hyn sydd ar gael yn hawdd ym myd treftadaeth.

Gair i Gall 8:

Os oes gennych gydweithwyr neu ffrindiau sydd â phlant mewn ysgolion lleol, ewch drwy’r llwybr hwnnw – mae’n well cysylltu â phobl gyfarwydd…

Gair i Gall 9:

Cynigiwch gyfleoedd peilot am ddim os oes modd – cynigiwch o leiaf gynulliad am ddim i’r ysgol gyfan ar destun sy’n gysylltiedig â’r prosiect ond sy’n berthnasol i faes penodol o astudiaeth.

Gair i Gall 10:

Os byddwch yn gweithio gydag ysgolion uwchradd, cynigiwch gymorth ar gyfer eu digwyddiadau trosglwyddo rhwng Blwyddyn 6 a 7 a gofynnwch i gael cysylltu â’u hysgolion cynradd bwydo. Maent yn hoff o ganfod ffyrdd o gydweithio.

Gair i Gall 11:

Gofynnwch i gael siarad mewn cyfarfodydd clwstwr lleol, digwyddiadau datblygiad proffesiynol parhaus, cynadleddau a chyfarfodydd y staff.

Gair i Gall 12:

Cynigiwch eich lleoliad i ysgolion gynnal eu diwrnodau cwrdd i ffwrdd / cyfarfodydd staff.

Gair i Gall 13:

Pwysleisiwch y natur drawsgwricwlaidd a’r cyfleoedd sydd ar gael yn eich adeilad hanesyddol / dysgu am dreftadaeth, gan gynnwys sut mae modd defnyddio casgliadau ac adeiladau hanesyddol i ddysgu pynciau STEM (gwyddoniaeth, technoleg, peirianneg, celf a mathemateg)!

Peidiwch â galw heb wahoddiad

Neu o leiaf peidiwch â galw heb wahoddiad a disgwyl cael ymateb. Does neb yn hoffi cael eu tarfu arnynt yn y gwaith neu pan fyddant yn brysur.

Os byddwch yn galw, ffoniwch ar adeg pan fyddant yn llai tebygol o fod yn addysgu.

A dywedwch, “Tybed a oes modd i chi helpu” a gofynnwch am yr “unigolyn gorau yn yr adran i gysylltu ag ef/hi am y cyfle”.

Mynnwch enwau / manylion cyswllt athrawon unigol

Cewch y rhain os byddwch yn galw heb wahoddiad ond mae’n debygol mai dyna’r cyfan a gewch. Maent yn ddefnyddiol er mwyn cysylltu â nhw’n ddiweddarach.

Neu cyfeiriwch at y pennaeth

A gwnewch y cynnig yn uniongyrchol iddo.

Mae amseru’n hollbwysig

Mae’r haf a mis Medi’n wastraff amser. Bydd mwy o ddiddordeb ganddynt pan fyddant yn dychwelyd.

Mae e-bost sydd wedi’i ysgrifennu’n dda at yr athro mwyaf addas (neu at sylw [y rôl fwyaf addas]) yn well na galwad

Nodwch ei enw, neu o leiaf bennaeth adran, a bydd yn mynd yn awtomatig at yr unigolyn cywir. Cewch chi well cyfle o lwyddo.

Hefyd, mae’n golygu bod modd ymateb pan fydd ganddo amser.

AM DDIM!

Os bydd yn rhad ac am ddim, rhowch hynny mewn llythrennau mawr yn eich e-bost.

Cadwch lygad allan amdanynt ar y rhyngrwyd

Ceisiwch weld a oes ganddynt flog, cyfrif Facebook neu gyfrif Twitter a chysylltwch â nhw ar y rheiny. Bydd cael ymateb yn fwy tebygol o greu argraff arnynt.

Hefyd, ewch i’w gwefan i weld a ydynt wedi cynnal prosiectau tebyg yn ddiweddar.

Dewch o hyd i sefydliad a fydd yn rhoi cymorth i chi

Mae gwasanaeth cynghori’r sir, tîm gwella’r ysgol neu, yn yr Alban, SATH (www.sath.org.uk) yn gysylltyddion da. Mae enw da ganddynt ac maent yn fwy tebygol o fynd trwy’r drws.

Mae gan rai cynghorau restrau dosbarthu sy’n mynd heibio waliau tân. Cysylltwch â nhw.

Ysgrifennwch lythyr atynt

Ysgrifennwch lythyr at y pennaeth mewn amlen wedi’i hysgrifennu â llaw. Rhywbeth anghyfarwydd yw hyn erbyn heddiw a bydd yn fwy tebygol o dynnu ei sylw.

Dewch i adnabod y derbynnydd/derbynyddion

Os gallwch neilltuo arian ar gyfer diwrnod cwrdd i ffwrdd i’ch derbynyddion lleol, bydd hyn yn eich talu yn ôl yn yr hirdymor.Roeddem yn arfer trefnu diwrnod cwrdd i ffwrdd ar gyfer gweinyddwyr yn y swyddfa ac yn ôl pob golwg roeddent yn gwerthfawrogi’r cyfle. Cawsom dystiolaeth anecdotaidd hefyd ei bod yn llawer haws siarad ag ysgolion ar ôl cael y diwrnod hwn.