1. Recriwtiwch wirfoddolwr neu gofynnwch am gymorth gan weithiwr proffesiynol!

Dwi wedi clywed hyn sawl tro, ‘Dim ond gwirfoddolwyr ydyn ni – does dim amser gennym i anfon datganiadau i’r wasg neu bostio ar y cyfryngau cymdeithasol.’  Os felly, mae’n werth i chi roi’r ffidil yn y to ac anghofio am bopeth arall, gan fod cyfathrebu yn hanfodol bwysig wrth gyflawni pethau, ymgyrchu, codi arian a recriwtio gwirfoddolwyr. Os nad oes modd i aelod o’ch tîm wneud hynny, chwiliwch y tu hwnt i’r grŵp am y sgiliau hynny. Does dim angen i’r sawl sy’n eich helpu ddod o gefndir adfer adeiladau – y cyfan sydd ei angen yw sgiliau ysgrifennu da, y gallu i greu rhestr y wasg ac ychydig o wybodaeth am y cyfryngau cymdeithasol.

2. Brandio, is-benawdau a pharagraffau parod

Mae logo proffesiynol ar gyfer eich sefydliad yn bwysig iawn ond does dim rhaid iddo fod yn gymhleth nac yn ddrud. Bydd angen is-bennawd pum gair sy’n esbonio’r hyn rydych chi’n ei wneud – sy’n ddefnyddiol ar gyfer pob math o bethau – o esbonio eich gweledigaeth i roddwyr posib, i’ch proffil ar Twitter.

Datblygwch hwn i greu paragraff parod i’w ddefnyddio fel darn cyffredinol o destun yn eich datganiadau i’r wasg a’ch deunyddiau marchnata sy’n esbonio’ch prosiect a’ch gweledigaeth yn gryno.

3. Amcanion a strategaethau

Cysylltwch eich cynllun cyfathrebu ag amcanion eich cynllun busnes a chrëwch amserlen o’r hyn rydych yn mynd i’w ddweud, wrth bwy mae angen ei ddweud, sut ydych chi’n mynd i gyfleu’r neges honno, pryd a ble.

Beth ydych chi’n bwriadu ei gyflawni yn ystod y 12 mis nesaf a sut ydych chi’n mynd i ddefnyddio datganiadau i’r wasg, eich gwefan, y cyfryngau cymdeithasol ac ati i’ch helpu i gyflawni’r pethau hynny?

Er enghraifft, rydym yn bwriadu adfywio ein bwrdd gydag arbenigedd ar gyfrifeg a’r gyfraith erbyn mis Awst. Mehefin/Gorffennaf, anfon datganiadau i’r wasg at gyhoeddiad/gwefan y rhwydwaith busnes lleol, postio stori ar ein gwefan, creu dolen i’r stori honno ar y cyfryngau cymdeithasol.

4. Lluniau, lluniau, lluniau!

Cadwch luniau o’ch prosiect a’r bobl a gyfranogodd ar bob cam y datblygiad, pa bynnag mor ddibwys ydynt. Nid oes angen camera proffesiynol – defnyddiwch eich ffôn. Sicrhewch eu bod nhw wedi’u fframio mor broffesiynol â phosib a’u bod yn addas i’w cyhoeddi. Tynnwch fwy na dim ond adeiladau a chefn pennau pobl mewn cyfarfodydd, ar deithiau neu’n gwneud gwaith caled ar y maes. Anogwch bobl i edrych ar y camera, symudwch nhw i mewn i safle da, a thynnwch y llun wrth ystyried y wasg. Agorwch gyfrif Flickr i’w storio a’u labelu mewn albymau. Mynnwch ganiatâd ar y pryd fel na fydd rhaid i chi ofyn i bobl amdano’n ddiweddarach.

5. Nid ôl-ystyriaeth yw cyfathrebu!

Cynlluniwch eich digwyddiadau a’ch llwyddiannau pwysig wrth ystyried y wasg. Oes dathliad arwyddocaol neu gam cwblhau ar y gweill – sut gallwch chi ddefnyddio hyn i adfywio’ch negeseuon a chyhoeddi datganiad newydd i’r wasg i gadw’ch prosiect yn sylw’r cyfryngau? Allwch chi fanteisio ar gynnig cyhoeddusrwydd da am ddim i ddenu noddwr neu roddwr newydd?